ერთად შევქმნათ ინკლუზიური საზოგადოება

ორგანიზაცია PH International საქართველო, ორგანიზაციასთან „მაკლეინის ასოციაცია ბავშვებისათვის“ (MAC Georgia) ერთად აცხადებს მცირე საგრანტო კონკურსს სკოლებისათვის. კონკურსი ტარდება სამოქალაქო განათლების პროგრამის „მომავლის თაობა“ მხარდაჭერით, რომელსაც ახორციელებს PH International საქართველო აშშ საერთაშორისო განვითარების სააგენტოს დაფინანსებით.

საგრანტო კონკურსი ხელს შეუწყობს ისეთი შემოქმედებითი და ინოვაციური სასკოლო ინიციატივების დაფინანსებას, რომლებიც გაზრდის საზოგადოების ცნობიერებას და გააუმჯობესებს შეზღუდული შესაძლებლობის (შშმ) პირთა მიმართ დამოკიდებულებას. პროექტის განხორციელებისას მნიშვნელოვანია, რომ სკოლა გახდეს ცენტრი, რომელიც შშმ პირებს სხვადასხვა სერვისებს შესთავაზებს, მიაწვდის საგანმანათლებლო პროგრამებს, რითაც ხელს შეუწყობს შშმ პირთა აქტიურ ჩართულობას სკოლისა თუ საზოგადოებრივ ცხოვრებაში, შექმნის ისეთ გარემოს, სადაც შესაძლებელი გახდება მოსწავლეებთან, მშობლებთან, ადგილობრივ მუნიციპალიტეტებთან, არასამთავრობო ორგანიზაციებთან, მედიასა და ბიზნეს სექტორთან თანამშრომლობით შშმ პირთა შესაძლებლობების გამოვლენა, საჭირო უნარ-ჩვევების განვითარება და მათი მაქსიმალური ინტეგრაცია საზოგადოებაში.

შემოქმედებითი და ინოვაციური სასკოლო ინიციატივების განხორციელება, რომლებიც გაზრდის სკოლის როლს შეზღუდული შესაძლებლობის მქონე პირთა ინტეგრაციის საკითხებში, მათთვის სხვადასხვა სერვისების შეთავაზებაში და მათზე მზრუნველი ადამიანების მხარდაჭერაში.

შემოთავაზებული საპროექტო იდეები უნდა იყოს შემოქმედებითი და ინოვაციური თავისი შინაარსით.

საგრანტო კონკურსში უპირატესობა მიენიჭება სამოქალაქო განათლების პროგრამის „მომავლის თაობა“ პარტნიორი სკოლების მიერ წარმოდგენილ განაცხადებს ან ამ სკოლებთან თანამშრომლობით წარმოდგენილ პროექტებს. სამოქალაქო განათლების პროგრამის „მომავლის თაობა“ პარტნიორი სკოლების სია იხილეთ ბმულზე

ყველა წარმოდგენილი იდეა უნდა ითვალისწინებდეს შშმ პირთა მხარდაჭერას სკოლის ადმინისტრაციის, მოსწავლეების, მათი მშობლების და პედაგოგების თანამშრომლობაის გზით. პრიორიტეტი მიენიჭება ისეთ იდეებს, სადაც ნათლად ჩანს სკოლის, მოსწავლეების, მშობლების, პედაგოგების და ადგილობრივი მუნიციპალიტეტების, არასამთავრობო ორგანიზაციების, მედიისა და ბიზნეს სექტორის თანამშრომლობა.

• საჯარო და კერძო სკოლებს საქართველოს მასშტაბით. 

კონსულტაცია საგრანტო კონკურსთან დაკავშირებით გაიმართება ფეისბუქის მეშვეობით, პირდაპირი ჩართვით, 28 სექტემბერს, 16:00 საათზე, შემდეგ მისამართზე:  https://www.facebook.com/civicinitiatives

ჩვენი წარმომადგენელი გააკეთებს საგრანტო კონკურსის პრეზენტაციას და ონლაინ რეჟიმში პასუხს გასცემს ყველა დაინტერესებული აპლიკანტის კითხვებს.

საგრანტო კონკურსთან დაკავშირებული კონსტულტაციებისთვის ასევე შეგიძლიათ მოგვმართოთ შემდეგ ტელეფონის ნომრებზე:

ოფისი: +995 (32) 2990049; 2233338

მობილური: +995 599 188 775

ან მოგვწეროთ თქვენი შეკითხვები: www.initiatives.ge – ზე (კონტაქტების განყოფილებიდან „თემატური კითხვები“-ს საშუალებით) ან ელ. ფოსტაზე: [email protected]

ჩვენ შევეცდებით დროულად და დეტალურად გავცეთ პასუხი ყველა თქვენს შეკითხვას.  

გრანტით დაფინანსდება პროექტები, რომელთა ღირებულება არ აღემატება 1500 ლარს. საგრანტო კონკურსის ფარგლებში არ დაფინანსდება ხელფასები და ჰონორარები. მხოლოდ გამონაკლის შემთხვევებში იქნება შესაძლებელი მოწვეული სპეციალისტების ჰონორარების დაფინანსება. 

საგრანტო წინადადებების წარდგენა ხდება ონლაინ www.initiatives.ge - ს საშუალებით.  ამისათვის შედიხართ პორტალზე, დააწკაპუნებთ ღილაკს „პროფილი“, გაივლით რეგისტრაციას ანდა ავტორიზაციას, მოძებნით ინფორმაციას მიმდინარე საგრანტო კონკურსის შესახებ (ქვემოთ) და შემდეგ მარჯვენა ზედა კუთხეში განთავსებული „აპლიკაციის შევსების“ ღილაკის მეშვეობით დაიწყებთ განაცხადის შევსებას.

თუ თქვენ საგრანტო პორტალზე არ გაქვთ რეგისტრაცია გავლილი, ღილაკზე „პროფილი“ დაწკაპუნების შემდეგ მოგიწევთ რეგისტრაციის გავლა ჩვენს მონაცემთა ბაზაში. მას შემდეგ, რაც რეგისტრაციას გაივლით, საჭირო იქნება ისევ „აპლიკაციის შევსების“ ღილაკზე დაწკაპუნება, რომლის შემდეგ გამოჩნდება გრანტის განაცხადის ონლაინ ფორმა.

იმ შემთხვევაში, თუ თქვენ რეგისტრაცია უკვე გაქვთ გავლილი და იმყოფებით საიტზე, „აპლიკაციის შევსების“ მეშვეობით შეგიძლიათ გახსნათ გრანტის განაცხადის ონლაინ ფორმა. 

საგრანტო განაცხადის ონლაინ ფორმა წარმოდგენილი უნდა იყოს მაქსიმუმ 3 წუთიანი ვიდეო პრეზენტაციის სახით, სადაც განმცხადებელი ვიზუალურად წარმოადგენს პროექტის იდეას. საჭიროების შემთხვევაში აჩვენებს იმ სივრცეს ან ადგილს, სადაც პროექტი უნდა განხორციელდეს. წარმოადგენს სკოლის ადმინისტრაციის, პროექტში ჩრთული წევრების და პარტნიორების კომენტარებს. ვიდეო პრეზენტაცია უნდა იყოს სამ ლოგიკურ ნაწილად დაყოფილი: 1. რა არის პრობლემა, რის გამოსწორებასაც გეგმავს განმცხადებელი? 2. რისი გაკეთება იგეგმება პროექტის ფარგლებში, რომ გადაიჭრას არსებული პრობლემა? 3. რა შედეგი დადგება პროექტის განხორციელების შემდეგ და ვინ მიიღებს სარგებელს? 

მას შემდეგ, რაც განმცხადებელი შეავასებს ონლაინ განაცხადის ყველა სავალდებულო ველს და ატვირთავს ვიდეო პრეზენტაციას, განაცხადი გადაიგზავნება საგრანტო კონკურსის ჟიურის წევრებთან შესაფასებლად.

განაცხადი უნდა შეავსოს პროექტის განმახორციელებელი გუნდის ლიდერმა, რომელიც შეიძლება იყოს სკოლის ადმინისტრაციის წარმომადგენელი, სკოლის პედაგოგი, მოსწავლე ან მშობელი. გუნდის ლიდერი იქნება პასუხისმგებელი პროექტის მართვაზე, თუმცა პროექტის განხორციელებაში აუცილებელია აქტიურად იყოს ჩართული პროექტის გუნდის სხვა წევრებიც.

გამარჯვებული პროექტები გამოვლინდებიან 2017 წლის ნოემბრის თვეში. 

საგრანტო კონკურსში გამარჯვებული სკოლა, მის საბანკო ანგარიშზე მიიღებს გრანტის თანხას. სკოლა იქნება პასუხისმგებელი თანხის მიღებაზე და მიზნობრივ ხარჯვაზე პროექტის განმახორციელებელი გუნდის ლიდერთან ერთად.  

პროექტების განხორციელების პერიოდია 2017 წლის ნოემბერიდან 2018 წლის აპრილის ჩათვლით.

პროექტის დასრულების შემდეგ გრანტის მიმღებმა უნდა წარმოადგინოს მაქსიმუმ 5 წუთიანი ვიდეო ანგარიში, სადაც ნათლად გამოჩნდება პროექტის შედეგი. ვიდეო ანგარიშის გარდა  წარმოდგენილ უნდა იქნას მინიმუმ 3 მაღალი ხარისხის ფოტოსურათი, პროექტის ფარგლებში შექმნილი მასალების ელექტრონული ვერსიები (მაგ.: ბროშურა, საინფორმაციო ფურცელი, მედია  გაშუქების ჩანაწერები, პროექტის შედეგები ციფრებში და სხვა).