,,ვირიბუს უნიტის (Viribus unitis) - ძალა ერთობაშია“

21-ე საუკუნეში ტექნოლოგიური და სამრეწველო განვითარების სწრაფი ტემპი გარემოზე ადამიანის უარყოფით ზემოქმედებას უფრო და უფრო ზრდის. საყოფაცხოვრებო თუ სხვა ტიპის ნარჩენები აბინძურებს ნიადაგს, წყალს, ატმოსფეროს, საფრთხეს უქმნის ბიომრავალფეროვნებას, ეს კი უშუალოდ აისახება ადამიანის ჯანმრთელობასა და ცხოვრების ხარისხზე. სწორედ ამიტომ გახდა მსოფლიოს სხვადასხვა წერტილში მცხოვრები ხალხისთვის ,,განათლება მდგრადი განვითარებისთვის“ კრიტიკულად მნიშვნელოვანი თემა, ხოლო სკოლა ის ადგილი, სადაც სოციალური პასუხისმგებლობისა და გლობალური ცნობიერების მქონე მოქალაქეები უნდა აღიზარდონ.
ჩვენი პროექტის:,,ვირიბუს უნიტის - ძალა ერთობაშია“ მიზანიც ზემოთ აღნიშნულ პრობლემას ეხმიანება. პროექტის ფარგლებში დაგეგმილი და განხორციელებული აქტივობებით გვსურს, ხელი შევუწყოთ მოსწავლეებში გარემოსდაცვითი ცნობიერების ამაღლებას, ბუნების მიმართ პასუხისმგებლიანი ქცევის ჩამოყალიბებას და სასკოლო საზოგადოების აქტიურ ჩართვას ჯანსაღი ეკოლოგიური გარემოს შესაქმნელად.